الكتاب المقدس عبارة عن حكايات منزلش من السما… يعنى مش وحي الهى؟
لا خالص الحكاية مش كده
في البداية لازم نفرق بين الوحي الإلهي وبين الالهام والتلقين.. الكتاب المقدس مش الهام للكتاب زي الهام الشعرا والادباء اللى بيتاثروا بالبيئة بتاعتهم وبظروفهم الشخصية… كمان الوحي الإلهي مش املا بمعنى حد يقول لحد تانى حاجة ويكتبها زي ماهي كلمة كلمة حرف حرف احنا دلوقتى بنتكلم عن الوحي المسيحي اللى هو شراكة بين الله والانبياء وباختصار وببساطة الوحي في المفهوم المسيحي مبنى على الاساسات دي:
1- الله بيختار الكاتب اللى هو نبي او القديس او الرسول ويحرك قلبه للكتابة او يأمره امر مباشر زي ما قال لموسى اكتب هذا التذكار وزى ما قال كمان لأرميا خذ لنفسك درج وسفر واكتب كل الكلام الذي كلمتك به.
2- الله بيسيب للكاتب حرية اختيار الالفاظ والكلام المناسب ليه وللشعب اللى هيوصلله الرسالة وبيكون روح الله مسيطر ومهيمن عليه؟
3- الله بيكشف للكاتب من خلال الروح القدس الحاجات اللى بتخفى عليه او اللى ميعرفهاش زي ما عمل ربنا مع موسى لما كشفله أمور الخليقة كلها من البداية.
4- الوحى المسيحي مفيهوش تقيد بلغة واحدة لأنه بيتكلم بلغة الناس عشان مهتم بتوصيل الرسالة لكل الناس فينفع يتترجم لأى لغة عشان كده الكتاب المقدس اتكتب في 1600 سنة في أماكن مختلفة وكتبوه شخصيات مختلفين لكن موضوعه كان واحد وكل قصة اتكتبت في الكتاب المقدس كان ليها هدف وهو يا اما التعليم او الإنذار التحذير يعنى ولما نشوف كام نبوة اتحققت من نبوات الكتاب نعرف انه وحى الهى مش مجرد قصص لأنه غير حياة ناس كتير وزى ما حد قال الكتاب المقدس كتاب ميقدرش حد يكتبه لو حب وميحبش حد يكتبه لو يقدر لأنه ببساطة بيكتب خطايا ومساوئ حتى الناس اللى بيكتبوه وهى دي امانة الله ووحيه.. هللويا.
