ازاى يتولد المسيح اللى المفروض انه الخالق من ست هو خلقها؟
سؤال رائع بس القصة مش كده..
اللخبطة دايما بتيجى من اننا مش فاهمين طبيعة المسيح، اللى هي إله كامل اتجسد في انسان كامل.
وخلينا في البداية نشوف آيات الكتاب بتقول ايه عن الله وعن المسيح في موضوع الازلية
أ- في سفر التثنية في التوراة 39 : 32 بيقول “انا انا هو وليس إله معي انا اُميت واُحيي”.
ب- بيقول كمان في سفر اشعياء النبي 6: 44 “انا الأول وانا الآخر ولا إله غيرى”.
واضح جدا ان الله هو اللى قبل البداية وملوش نهاية.
والطبيعة الإلهية في المسيح يكلمنا عنها الكتاب في انجيل يوحنا 8: 58 “قبل ان يكون إبراهيم انا كائن” يعنى قبل العدرا مريم وبعدها هو موجود… وكمان في سفر الرؤيا بيقولنا “انا هو الالف والياء الأول والآخر”.. يعنى الكلام واضح جدا بلا اى لبس في الطبيعة الإلهية للمسيح
الابن اللى صار جسدا يعنى اتحد في جسد إنسانى… الجسد الإنساني ده هو اللى اتولد من العدرا مريم لأن المسيح ببساطة بحسب ايماننا وبحسب آيات الكتاب انسان حل فيه روح الله
زي ما بيقول الكتاب في رسالة فيليبى 6 : 5-8 ” الذي اذ كان في صورة الله لم يحسب خلسة ان يكون معادلا لله”.
يبقى بأختصار،
المسيح عنده طبيعة الهية وهو أزلي ابدى بلا بداية ولا نهاية.
المسيح عنده طبيعة إنسانية حبلت به العذراء مريم.
لما جه الوقت المعين من عند الله وبحسب مشيئته وتوقيته.. اتحد الله الأزلي الأبدي بالأنسان المولود من العدرا مريم يعنى مفيش مريم قبله والكلام ده.
